মুখ্য পৃষ্ঠা
06/04/2515:00
কাল অমাৱস্যা
কবৰ দিয়া আন্ধাৰ ভেদি
পদুলিত এজাক জোনাকী উৰিছে |
এজাক মৃদু বতাহত ,
গৰ্ভৱতী শেৱালী জোপা হালিছে-
জালিছে !
আয়ে পদুলিত ৰৈ ,
পিতাইলৈ অপেক্ষা কৰে |
পিতাই যে উলটি আহিব নোৱাৰে
সোঁৱৰণিৰ জোনাকী বাটেৰে !
আয়ে বুজিও নোবোজে !
তিমিৰাচ্ছন্ন আকাশত ,
এটি-দুটি তৰাৰ ফুল ফুলিছে |
কজলা ডাৱৰে জোনবাই জনীক
বাৰে-বাৰে সান্নিধ্যৰ চুমা যাচে |
জোনবাই জনীয়ে অভিমান কৰে !
উত্তৰ দিশে এটি চিনাকি তৰাৰ ,
এগচি চাকি জ্বলে |
তেজৰ বৰণ বেজাৰত ক'লা হৈ পৰে ,
এডাল বিষাক্ত সাপ হৈ
অমাৱস্যাৰ ৰাতিয়ে পৃথিৱী গিলিছে !
বৰঘৰত মাটিৰ চাকি এগচি
উমি-উমি জ্বলে !
পিৰালিত শিলোৱা এন্ধাৰে মোক
মেৰিয়াই ধৰে |
© ৰাজু কলিতা
15/06/14
